MBL Day-2 thlirlawkna

13^th November, 2017

3rd Hrangbana Memorial MBL chu nihnihna chhunzawm a ni dawn a, Mizoram chhim lam Southern Acers Siaha leh chhaklam Ralte Villa BC Champhai te an in hmachhawn dawn. Siaha lam hian an Team tichak turin Mizo player zinga BAI Ranking nei sang ber Ranking No. 88 pahnih zinga pakhat zawk Puipuia an nei a, ani tha ti chak tur hian Haryana lam chhuak BAI Ranking No 89 Askhit Mahajan an nei bawk. Hei bakah hian Mizo Junior rawlthar rawn tha chhuak tak MBA Ranking No. 3 Nunhlua an la neih bakah hmeichhe lamah Venhimi an chhawr turin a la awm bawk. Heng bakah hian Senior player M.Joseph,Remruata leh Lianzuala anla awm bakah Junior player Hmangaihzuala an la kawl tel bawk. Heng players tha tak takte hi coach Thanliana’n a rawn rem dawn a ni a, an huphurhawm viau tura ngaih theih a ni.

Champhai lam players te hi Jerry-an a rawn rem ve dawn thung a, an hmatawng tur hian MBL zawng zawng la khel kim vek leh BAI Senior Ranking No.1 Daniel an nei a, a tha tichak tur hian chhawrtur Rindika, Steven, Sangtea leh Hmingsanga te a neih bakah amah ngei pawh a inchhawr tel thei bawk. Junior lam khel turin MBA Ranking No. 2 John-a an nei bawk. Mixed lam khel turin Ponty an nei a, an Team enin Senior lama an rawn in tlar dan tur hriat thiam a har viau thei, an squad erawh an duai viau lovang tih a hriat theih thung.

TIE hnung zawkah Chanmari Evening Stars leh Mission Veng te an rawn inhmachhawn ve dawn thung. Chanmari lamin State pawn player atan BAI Ranking No. 92 Aimson Singh Oinam an nei a, Mission Venglamin BAI Ranking No 3 leh BWF Ranking No 100 Pratul Joshi an nei ve thung, an game a hmuhnawm dawn, tunhnaiah Badminton khawvel ah Upset hmuh tur a awm nual a, Ranking sang an chak vek lo,chuvangin chak zawk tur sawi lawk a har. Chanmari lamin Junior ah MBA No. 1 Raju an nei a, Mission Veng lamin MBA No. 8 Sawma an nei ve bakah Issac a la awm bawk a, hei pawh ranking hmana decision siam mai theih chi a ni lo bawk. Hmeichhe lamah Chanmari in Player Senior Rinzuali an nei a, Mission Veng lamin Rinhlui leh Mahruaii an nei ve bawk, chak zawk niturin Mixed Partner an that a ngai thung. Mens Singles, Doubles leh Mixed-a chhawr tur hian Chanmari lamin Ismael, Jonanthan,Jojo leh Freddie an nei a,an Coach Chhuantea hian engtin nge a rawn rem dawn hriat thiam a har. Mission Veng lamin Zarkima, Lalmama, Johny-te ho hi Coach Roger-an a rawn rem dawn a ni. Game a hmuhnawm dawn a, en loh phal chi a ni lo ang.